KA RNGIEW

U BRIEW U LONG U JINGTHAW BA KONGSAN UBA ÏAPHER NA KI MRAD BAD NA KI JINGTHAW BA IM BA PAR BAROH HA KA KHYNDEW. U DON KABOR SNGEWTHUH , KA BOR PYRKHAT BAD KA BOR BAN KREN BAD PYNSHONGNIA ÏA KAEI KAEI KABA U KREN BAD ÏA KAEI KAEI KABA U SHEM. U BRIEW LA U DEI U JUH U JAIT JINGTHAW ,PHEWSE , UDON HI KA JINGÏAPHER PARABRIEQ SHIMET SHIMET, HA KA LONGRYNIENG, KA DUR KHMAT ,KA BOR SNGEW THUH BAD KA RUKOM PYRKHAT. LA JU DON KIBA ONG BA KA DUR KHMAT KABA PAW SHABAR KA PYNI ÏA KA JINGIM BAD JINGLONG KABA DON HAPOH U BRIEW; KATA KA LAH  BAN LONG HA KI KATTO KATNE KI BRIEW  KIBA DANG SHISUR KA JINGIM BAD KIBA DANG SYNLAR KA JINGMUT JINGPYRKHAT.
    U BRIEW U LAH BANLONG U BASNGAID NE BA RAIKHOH ,UBA JRONG KA RYNÏENG NE U BA LYNGKOT , UBA KHLAIÑ BOR NE UBA TLOT, UBA BHABRIEW NE UBA SNIEWBRIEW -NE KINE KIM LONG KA DOR HA KA LONGBRIEW NE MANBRIEW.NGI JUBISHAR ÏA U BRIEW TANG ÏA KIEI KIEI KIBA PAW HABAR BAD NGIM SHEMPHANG EI EI ÏA KA JINGLONG KABA SHISHA KABA DON HA KA LONGRYNIENG MANRYNIENG U BRIEW SHIMET SHIMET.
        KA RNGIEW KA RWIANG BAD KA KSAW KI LONG KI JINGAI BA KORDOR U NONGBUH NONGTHAW HA U BRIEW SHIMET SHIMET.KI LONG KI JINGAI KIBA DA PUN DA KHA BAD NANGSAN BAD NANGROI.YMKI BRIEW BAROH KI ÏOH ÏA KINE;DEI TANG U TA U BA U NONGTHAW U DA  AI BAD BUH KYRPANG LA JU ONG BORABOR , U BRIEW UBA "EH " NE "JEM "RNGIEW ; UBA HEH KA "BOK" , KA RWIANG ; UBA "SHONGKSAW ".
      KA RNGIEW HA KAWEI PAT KA LIANG , KADEI KA JINGLONGTRAI BAD KA BOR LONGBRIEW MANBRIEW KABA DA AI KYRPANG DA U NONGBUH NONGTHAW HA U BRIEW SHIMET SHIMET KABA PALAT ÏA KA JINGSHEMPHANG BAD KA BOR SNGEWTHUH BA KYNJA BRIEW .BUNSIEN, NGI JU KREN SHAPHANG U BRIEW UBA EH RNGIEW NE JEM RNGIEW.NGI JU PYRKHAT BA KITA KIBA I EH DUR KHMAT KI DEI KIBA EH RNGIEW , BAD KITA KIBA I JEM DUR KHMAT KI DEI KIBA I JEM RNGIEW. HA KA JINGSHISHA  , YM LAH BAN PYNSHONG NONGRIM TANG HA KA DUR KHMAT.KA RNGIEW KA DEI KA LONGRYNIENG MANRYNIENG HI BAROH KAWEI , KABA KYNTHUP ÏA KI DKHOT MET BAROH, KI KHLEIÑ SHYÍENG,KI THIED SNAM , KI TYRSIM WAT HADUD U SHÑUIH KHLIEH.U BRIEW U LAH BAN LONG U BA RAIKHOH BAD I TLOT MET HYNREI HABA U LONG UBA EH RYNGIEW KI BOR PYNSNIEW JONG KA MARIANG KIM LAH BAN ÏALEH PYRSHAH NE PYNSNIEW ÏA U. DA KUM WEI PAT ,U BRIEW U BA HEH BAD U BA Ï KHLAIÑ HABA U LONG U BA JEM RNGIEW, U TANG SHU ÏOHI ÏA U BSEIN NE UNO UNO U MRAD KYNSHA BA U ÏENG BAN PUH NE DAIT ÏA U , KA SYRNGIEW JONG U TA U MRAD KA KEM HA U BAD KA PYNTRIEM NADUH KI THIED SNAM HADUH U  ÑUIH KHLIEH; HABA U LONG U BA SNIEW BOK U LAH BAN KEM PANG BAD ÏAP.YM TANG KATTA , KA WAH KABA U SUM , KI DIENG KIBA U KIEW ,BAD KI SIM KIBA HER KI LAH BAN KEM SYRNGIEW BAD  PYNPANG ÏA U BRIEW U BA JEM RNGIEW.
   HA KA RUKOM PYRKHAT KHASI ,BAN EH KA RNGIEW HA KA LONGRYNIENG JONG U BRIEW NE KA BRIEW , U NONGKÑIA U PYNÏENG DA KA KÑIA KA KHRIAM BAD KA NIA KA JUTANG . ÏA KATA KA JINGKÑIA , KI JU KHOT KABA KSAN RNGIEW. KI PYNSHONG ÏA UTA NE KATA KABA MUT BAN KÑIA , HAJAN KA JINGKÑIA .U NONGKÑIA U KÑIA DA KA SYIAR KABA TLEM BAN KYRPAD HA U NONGTHAW BAN PYNKSAN BAN PYNEH LA KA RNGIEW HA KA LONGRYNIENG HABA ÏAID NE ÏENG , HABA BAM BA DIH , HABA TREI BA KTAH WAT HABA THIAH BA DEM, HANGNO HANGNO HABA U NE KA DON BAD BAN PYNNEH NE PYNSLEM ÏA KA RYNÏENG KA RTA.
    U NONGKÑIA U PYNLONG TENG TENG ÏA KANE KA KÑIA ''KSAN RNGIEW '', SHISIEN SAN SNEM LANE SHIPHEW SNEM.
                        ********